冇火砌o野, 走去購o野~~~

你問我失驚無神做乜購(正音讀'救')o野??!

事緣近日hkml有位師兄o既"近實時"深水埗福利部報價,
真係睇到我心癢癢~~~
今日放工就索性走去打算硬購一場!!

走在路上的我, 仲糾(正音讀'九')纏於如見到$93之F2渣好唔好入返隻時,
入到店內, 就發覺自己之前的糾, 係多餘的....
皆因店內的兩款F2, 已被各方模人自發的搶購行動一掃而空.
再搵搵另一目標物 *衛素[一般機]- $125, 亦已經人去樓空!!
只剩下兩盒新出的 衛素[隊長機]- $135....

[*註: "衛素" 係小弟自把自為的將ReZEL用廣東話音譯,
官方刊物譯名"里歇爾"應係來自國語/普通話音: li xie er
用廣東話來讀係實在太無厘頭吧!!~~~
普通話的音譯逢R, L 加個"爾"落去,
再用廣東話去讀係一丁點意義都冇.
近年來, 香港媒體對外國名字的譯法都好尷尬,
一係用祖國譯音(即係下下都五六個音節),
一係就照打英文算數,
總係唔肯用下個腦以廣東話音譯.
唔知幾時, 我o地就要講"貝克漢姆"而唔係"碧咸",
要講"鋼彈/敢達"而唔係"高達"....]

原本就冇打算入盒隊長機, 所以拿上手睇o下就放低o左.
反而入o左盒獨角獸- $90(參加下年笑笑大合照之用),
同埋盒30巾- $70 (唔好問我做乜購佢, 我都未知...).
連隨就過o左黃金買o左2盒NOD32更新版(家用2年,$150 each),
都拖o左幾個月冇更新, 再拖就expire要買過個完全版,
貴多十幾廿蚊.

思前想後,一場蒞到,
都係行返轉頭去福利入隻衛素隊長機.
但係, 要硬購的又豈止我一個,
最後的兩盒都被人購埋~~

正係死心離去之際, 店員剛好又從倉中取出5,6盒隊長機.
加上見到清減o左, 淡掃娥媚的日間店長,
馬上又令我的購慾再次硬起來.
急不及待的從褲內掏出我的....銀包,
俾錢走人~~

咦?! 咪住, 呢支XF-57水性油-$10,
就係KY介紹的舊化佳品?
入返支先.

就係咁, 唔駛半個鐘600大元就游走了....
深水埗, 真係男人o既銷金窩(一般平民用).