呢個禮拜都只係整好o左個盾, 個背包都未搞....
現有請"紅彗星
"客串一o下示範試裝.
(隻炮渣現在剛開始噴油中)
背面主要亦係用0.2膠片補造d細部.
另外, 荃灣終於有真正真正模型舖嘞!!
早兩日行荃灣萬景峰個新商埸荃新天地,
(即荃灣大會堂對面新樓盤)
見 franc franc家品店對面開o左間環球.
該店主打都係玩具多d, 軍事同高達模型只係各佔一part.
(唔駛講高達模型例牌賣貴幾成~~)
暫時都只有兩個郡仕油架賣o下油同噴罐, 其他用品未見.
不過見該店仲係空洞洞好似未放滿貨咁,
唔知遲d多唔多模型用品番貨??
有呢間舖對於我呢d荃灣友(蟹sir家陣都係喎)都係好事,
就算放假唔夠油用, 都唔駛等翻工至出九龍買嘛.
好啦, 又要開工砌o野先!!
趕呀.... 趕呀....
尋日打風整日橫風橫雨, 見隻「浣熊」都幾強勁
屋企人原先約好今日去拜山, 都要改期避一避佢.
點知到今朝又會咁好天!! 真係吹脹~~
咁就"無啦啦"多o左日空閒假期,
最好就係繼續趕工砌o野了.....
呢個禮拜晚晚都係响度又補又磨又雕(苦差呀~~),
終於今日可以幫d件洗白白等噴灰.
未"上妝"前幫佢映番張"素顏"相先.
噴灰後, 發覺件o既表面比起小弟之前o既作品瑕疵較少,
需要細執o既地方冇咁多.
無他o既, 因今次做多o左樣工夫,
就係於多改造&多填補o既位置多塗上一層開稀雙星畢地,
跟住再用1000號沙紙打磨.
可以除去肉眼較難察覺o既小瑕疵.
各位, 呢個post都仲係冇咩進度睇~~~
只係想話俾大家知, 雖然砌得好慢, 但我冇放棄到....
小弟三月工作上較忙, OT放工後都冇咩精神埋檯砌o野.
點知話咁快就到四月, 離"笑笑團"得翻一個月,
真係要開turbo至趕得切!!
(不過我之turbo都仍係"高龜速"而已~~~
)
之前見dilaton兄的F2渣古裙甲有合不隴的問題,
呢隻炮渣對"方形肶"就更加令條裙會嚴重露底!!
唯一方法就係改闊條裙就翻個"籮".
