吉姆大炮-製作中_07@笑笑團09

前幾日聖誕假期原先諗住可以衝幾日追番的進度, 可惜係作病頭痛o左兩日, 其餘時間亦要陪o下老婆同阿女.... 實在係嚴重"開工不足"~~~ 冇計啦, 冇咩做過下都係咁二出篇blog算數.....

上次隻炮渣用過強力磁石後, 發覺都幾好玩. 今次在炮吉身上更多處用上:
1.手臂內的用來掛盾.
2.臀部裝甲兩個裝備位的用來掛彈匣.
3.支炮入炮彈位的亦係裝彈匣.
強力磁石購自"華發"(地址: 鴨寮街170號門前排檔)(資料來源: toysdaily), 呢檔有好多唔同大小磁石揀, 細粒的價錢$1-2. 我 lunch行時都唔係次次見佢開舖, 遇著佢開舖的話真係入十粒八粒都唔嫌多.

腳跟護甲原本打算照抄B-CLUB隻炮吉, 即係將旋轉軸連接在腳跟關節. 可惜我呢隻炮吉個"褲管"造得太闊, 會頂住腳跟護甲令腳掌活動唔到. 咁就唯有將個旋轉軸連接位改在"褲腳"上. 我諗o左好耐都諗唔到有咩簡單方法可以整塊護甲套上去, 只好將塊護甲斬為前後兩件, 掛在"褲管"旋轉軸上至再黏合. 不過呢個步驟要待"褲管"上色後再做, 無端端又多o左功夫......

個背包開始動工, 用上FG高達個背包係貪佢比較現代感重.

各部份都開始o左刻線+細部工序. 參考了老Q兄的刻線教學真係快手好多, 有興趣o既不妨去拜訪.

眨眼間2008年又過去, 今年全世界都發生o左好多事, 有喜有悲.
當中對中國而言尤其真係悲喜交集.....
唔知2009年世事又有何方向呢?? 當然係希望喜多於悲啦!!

自己來說過去一年都算係事事順利(唔計積蓄少o左一截~~~), 家人健康平安都已係一種福份矣.

模型方面, 今年成品又係得一件咁大把-- 炮渣, 因此都無謂學各位blog友般做年結了.... 希望來年可多幾件成品, 真正磨練上色舊化等技術, 可以做個唔係齋改, 技術更全面o既模型愛好者吧!!

祝各blog友: 2009, 模型砌到停唔到手!!

吉姆大炮-製作中_06@笑笑團09

其實呢篇blog都已一早開始寫, 但小弟想儲多少少料至出.
不過高達迷兄開聲監督下,
小弟實在汗顏..... 連忙update一下進度.

開始造個膊頭炮位,
上一篇網誌見到個樽蓋就係做炮管的活動齒輪.
好多blog友亦好眼利一眼就睇得出.
原因可能係呢種齒輪在'一年戰爭'數隻機體上都可找到,
(e.g. 鐵球, 雷射大炮II....)
可以話係當年大河原氏機設o既標誌之一.
近代機設呢類活動位大多已經俾油壓管所代替.
而今次小弟係都要"根性"一o下, 試試造個齒輪出來.
其實呢種齒輪活動位可以簡單地在炮身下面加個半圓,
再用條軸串起就ok. 不過在我呢隻炮吉上就行唔通,
因為右膊已藏有肩關節, 已經冇位放得下成餅半圓齒輪了.

小弟o既解決辨法係做個假狗齒輪,
將個pc膠活動位藏在炮身內再套在假齒輪上,
支炮俯仰時個假狗齒輪就會部分轉入炮身內.
個齒輪就固定在右肩炮位內支撐起成支炮.

炮身製作中.... 零創意直接跟足原設做. 自MSV原件上切出各部拼合而成.

呢個設計有個局限係支炮個活動角度唔可以太大,
但用在炮吉上就都算ok.
個假狗齒輪另外有個好處係支炮成品後仍可拆下方便運輸.
上次隻炮渣個炮身關節就係郁動得多加上運輸多次後就爛了.

原本隻吉吉腰間裝甲係前面一大塊+側面兩塊可動,
而後面塊裝甲fix死係笨大HG套件傳統做法.
咁樣在擺pose時大腿就會因後裝甲頂住而減少可動範圍.
當小弟正想魯莽引刀一快將佢pat pat斬開幾件大改之時.....
等等....吉吉前後裝甲外觀根本就所差無幾!!
索性就咁將佢前後掉轉 -- JJ當pat pat!!
咁就簡易地做到後裝甲可動啦.

再將掉轉後之前裝甲改為兩塊獨立可動.
原本之側裝甲我就覺得太薄.... 改用GM Command之側裝甲.

繼續整佢個頭, 兩隻耳仔來自壽屋補品,
但何以係白色? 皆因亦係複出來的件.
用蝕刻鋸切薄, 在底部米字形貼上0.2mm膠片.

唉~~~ 咁快就又十二月了!! 真係唔可以再懶, 要加速趕製~~~
佢...佢....真係就快來到了.....

吉姆大炮-製作中_05@笑笑團09

近呢幾個禮拜晚晚放工返家都係處理o下家中瑣事,
就算係埋檯砌o野最多都係玩玩素組,
一時之間冇乜動力, 搞搞o下真係冇耐就到笑笑團了

呢排真係買模型多過砌模型, 所入o既並唔係咩新鮮貨色,
只係行開深水(土步)見有平HGUC或舊模型就買番盒.

(下圖: 對隻炮渣真係有d情意結, 見賣$20盒又乖乖地俾錢....
嘉布蘭'嚇鬼價'$50, GP01友情價$40)

(下圖: Z巾武器一set $10, 睇o下有包麻油膠水!!)

以上物品再加埋在yahoo拍賣場手痕bid返來的素組模型,
小弟櫃頂模型山又多添數位成員~~~

雖然隻炮吉進度實在有限, 都勉強update一下:-
開始搞佢個頭, 第一件事係先處理個觀景器.
為o左保護呢類透明件, 我會先塗上一層遮蓋液以防錯手刮花.
呢隻吉姆係較早期出品的HGUC,
透明觀景器後係"空鳥鳥"乜都冇的.
小弟都係跟模型雜誌作例做個簡單觀景器內構.
觀景器原件係連住額頭感測器, 要先用蝕刻鋸切開.
再在觀景器內側塗上少少"凡士林"做離模劑,
將混合畢地按上內側然後待乾,
乾後除下就可成為內構部件.
由於小弟預計會再砌呢隻HGUC吉仔,
所以又將佢用單面模複件備用.

上色方面係先上鐵黑(噴油時至知我原來冇2號"令"黑)
再上8號仔銀, 出來效果尚算ok.

接住做埋個前額感測器(來自原件)
及後腦感測器(從透明件的*流道切出)
例牌工作將額頭機槍位鑽洞換上幼銅管.
至此個頭仲差兩隻耳仔&後腦部份未完成.
* 註: "流道"即係模型套件的膠框, 都係學自龍飛兄本'模魂誌'

早前嘗試用自由樹脂製模複 Powered GM 套件所附手掌,
今次試o左d新搞作,
製模後除了用模型刀切出由下流入注料管道外,
在可能積存氣泡位置直接用1mm鑽咀加多條注料管道.
因為自由樹脂係透明, 可以從模底部對準個位鑽入去即可.
以模型刀切開模內側至鑽出管道, 方便之後取出複件.
不過倒AB水時要封好個孔, 唔係就漏料.....

(下圖: 相中係複右手o既自由樹脂模底部, 可以清楚見到手形狀.
粉紅色係入料管位置, 粉藍色就係鑽出的入料管.)

結果出來持槍隻右手兩件部件都ok, 但左手就少o左幾隻指尖~~~
不過用得唔好"徙", 如以膠條補造指尖的話應該還算可用.
(下圖: 左手冇o左d指尖, 嗚嗚~~~)

此外, 受"模谷" alex_d_liu兄作品用上膠樽蓋作改造所啟發,
小弟搵遍全屋至搵到個合size樽蓋~~
但可惜個蓋係軟膠, 唔多o岩用, 加上我想要個實心o既部件,
因此就以此樽蓋造o左個單面模複製出一個圓餅型部件,
唔知大家估唔估到呢件東東會用在炮吉邊處呢??

(下圖: 以dymo帶作軟尺, 用蝕刻鋸切去頂及底部)

好啦, 暫時係咁多先, 下次update要多d進度至得.

my 08電撃評判感想

見眾blog友都post自己電撃作品評語, 小弟都來襯熱鬧先!

「製作雖然出色，但若加上舊化效果作品的層次會更突出。」

雖然部分blog友得到o既評話都好行貨, 又或者係有d無棱兩可.
但小弟又覺得俾我o既呢句真係好"中"喎!!
加上昨晚"蟹sir飯局"親眼見到KY兄隻靚靚"櫻花",
頓時間感受到"舊化力量"o既衝撃~~~
睇怕都真係時候要在呢方面多加苦功了.....

諗住開多條line玩齋拍唔改(又或係極少改),
用來練上色舊化, 又可以順便清清d存貨嘛.