Blog友笑笑團2010 - 風雨中盛放 (奧干篇)

207係2010笑笑團的舉行日,
亦係"無啦啦"落雨落到嘭嘭聲的一日, 仲要係成日冇停過~~
不過, 咁係淋唔熄我地心中o既一團火o既....

大會各工作人員十時多就到達現場set up.
今年場地大o左, 唔緊要, 我地人都多o左.
大家唔駛多講就各自埋位, 有搬檯的, 有set攝影角的,
貼poster/banner的, 擺reception的....
呢d, 咪就係plan得好+默契!!

而搬檯其間, 俾我地發現一件事.....
原來大力士真係好大力!! 佢一個人就可以搬起一張長檯!!

呢幾天各blog友都接力報導當日盛況,
以及當晚慶功party的'慘烈'戰況,
相信大家巡blog時都可能會睇到'kit'聲笑出蒞.

在此就等小弟做個'網上二流導賞員',
概括講講我有印象而又有影到相的作品,
(因小弟當日掛住吹水, 好多佳作都無暇留影....)
希望身在他鄉的, 要返工的, 家中有事的團友們,
多一個角度欣賞當日作品.
(即係一般下級龍友技法-- 低炒高炒咁o羅~~)


一入正門就一定會俾呢隻鮮黃奧干機體吸引住,
就係污里小龍兄的METHUSS STRIKER
全身裝備+武器令整體橫鍊不少.

佢仲有兩隻Z friend o架, 不過仍未完成.
期待下年成品上陣!!

再望入一d就係大力士兄的神級作品重裝力奇大力士
當日佢o既出現我都嚇一嚇, 又話輕裝上陣o既?
家陣居然比重裝更加重裝.
當天兩枚巨炮仲要不斷轉換位置,
真係轉個頭又唔同o左樣!!

咦?! 莫非呢個背上有第三支super mega cannon的,
就係計劃中的最終型態?!!
哦~~ 呢個極秘企劃都俾小弟洞悉到, hehe....

又一神級作品, B哥的全自雕迪殊
呢隻咁華麗o既作品原來都只係由原子灰,
膠片等卑微材料建成,
小弟除o左O咀, 仲可以點?!
當日B哥在同高地兩大雕神的教學中仲透露,
佢的作品在製作工具方面都一樣係咁平民化.
cutter刀片自家改動一下就可以當貴價推刀用,
真係塞錢入大家袋呀!!

Z無國界小隊

新任燈神團長的Z巾
每次見燈神set件時都要掏出一排鈕電, 一把tweezers,
逐個部位拆開入電, 真正係"粒粒皆辛苦"....
但係效果咁正, 辛苦都係抵o既.

蟻兄的亞寶Z巾
佢自己話好唔掂多瑕疵,
我睇o左大半日都發現唔到喎~~~

地理SIR的數碼迷彩Z巾
實驗自製數碼迷彩水貼十分成功,
心機&功夫更係唔少得. 
要將水貼鋪滿一隻HG 90%以上表面,
對我來講仲係不可思議.

唯一可惜係姿勢唔夠威猛~~
如果地理SIR冇空修改, 不如交俾我地ws將佢....

蟲大人的條碼迷彩Z巾
唔好見佢灰灰藍藍, 見實物色彩其實係相當豐富.
條碼的做法好有抄考價值.

macross2016兄的裂甲Z巾
雖然仲係半成品, 裂甲細部同身型都好正.
希望下次可以見到成品啦!!

(下一篇予告 泰坦斯篇)