Z Gundam-製作中_01@笑笑團2010+Z無國界小隊

我呢兩個星期查實冇偷懶, 不過係我暫時撇低哥邦迪, 開了隻HGUC Z....
皆因小弟參加o左kog兄領軍o既"笑笑團2010"直屬部隊-- Z無國界小隊!!

Blog友們睇到呢度一定暗罵:
"呢兜友又開新火頭?! 到底幾時至砌起有成品??"
冇錯呀!! 我都想知自己幾時至砌起有成品~~ 上一隻炮渣已係半年以上o既作品, 至今砌緊o既炮吉&哥邦迪對於我來講都係屬於'大改'一類作品. 我相信各位都會覺得小弟上色方面係無咩進步, 其中好大原因係我一年砌得一隻半隻'大改'東東, 令到我唔想衰收尾, 上色方面就會選擇保守方向~~~ 因此, 小弟早有量產MS練習新技術之意念. 今次, 就藉著kog兄發起呢次齊齊砌Z活動踏出我o既修鍊之路.... (即刻在網誌分類開多條MS量產線先!!)

呢隻Z係來自早幾年瑞記開倉購入o既box set, 其中我最想砌隻百式, 又或會用隻MK II來改o野, 而最少機會會砌o既就係呢隻Z.... 點知家陣就開o左佢先!!
哈~~ 砌模型都一樣係要講緣份o既~~~

由於我從未砌過MG(買就買o左幾隻....), 呢隻已經算係小弟到目前為止所砌過最複雜o既模型. 素組之後梗係立即玩玩變型先, 相信砌起之後都唔會將佢咁玩法, 所以先幫佢拍照留個紀念, 準備,  一.... 二.... 三....變!!

隊長kog下令: 只可作有限量小改,例如加細節,刻線和補品等等, 而大修改例如全骨架,改變身型比例等請盡量避免. 咁就真係o岩晒我量產理念, 一於小改加小量刻線及detail就算. 不過有d位就係自己惡習發作, 唔搞搞佢唔安樂~~~

由佢個pat pat搞起, 後裝甲係一體啤出來. 小弟原本只係想將甲與甲之間連接用多餘o既膠切走就算, 但係搞搞o下都係將佢切開成為三件. 原套件的噴射口, 梗係要切走晒佢先安心啦. 

腰間裝甲亦照慣例地用原子灰及膠片補番d空位.

腳裝甲及其他偷膠位都用原子灰填滿, 尤其係雙膊o既六角形構造空洞洞好顯眼, 唔理咁多, 又將佢切落蒞用原子灰填滿佢. 如事者咁就搞o左成兩個星期了.

小弟係好少買電擊或Hobby Japan睇, 在模型友中都可算係異數. 原因係我間屋太細, 買返來o既模型書我又唔捨得掉. 日積月累只會減少自己生活空間. 下面呢本2003年12月號都係west turtle兄俾我o既. 點解唔掉d書?? 因為真係搵到有用o既資料o架, 我就响呢本舊書度搵到HG Z簡單完成作例.

再揭後幾頁, 咦?? 書入面有幾幅相咁熟口熟面o既?! 呢幾個咪係kitp, 小鯊, 仲有sk ?! 係呀, 就係呢期公佈03年電擊賽果o既. 相信好多blog友都有珍藏, 係咪??