真‧ROBOT魂

睇完蟹SIR篇熱血阿伯, 點燃了我的『真‧ROBOT魂』!! 唔好俾佢停, 繼續來多兩段片!! 不同阿伯隻苦戰多年自家製hobby大作, 呢兩隻係美國國防工業產物的"真robot"!!

1. 四足步行機械人
要留意個研究人員竟一腳伸落隻o野度!! (段片都幾嘈, 要調細聲至好開)

2. 疑似Power Suit/裝甲服
SF3D迷o既佳音!!

不過佢o地離實用階段仲有好遠好遠. 加上奧巴馬cut國防經費, 可能胎死腹中都話唔定~~~ 要見18M 高o既MS會行會走, 可能要等高達60週年!!....

P.S. 睇返自己個blog介紹係 -- "都係d模型呀, 軍事o野咁啦", 不過開o左blog幾年都冇出過一篇關於軍事o既 post, 呢篇都要算係第一篇~~~ '軍事'同'模型'好多時係一脈相成o既 hobby, 而小弟只係一個冇記性o既軍事愛好者, 唔曉背spec又記唔曉背歷史, 只係吹吹水而已.... 大家要多多指教呀!!

21-Apr-09 update

我個女見到'四足Bigdog'時已話好似兩個人對住彎腰抬住o野咁, 估唔到真係有人自拍o左段片!!

Z Gundam-製作中_05@笑笑團2010+Z無國界小隊

話咁快又到"每週一up"時間!!
過去一週雖有幾日復活節公眾假期, 奈何小弟的行情排到密麻麻:- 有去玩的, 有陪家人的, 亦有工作上的. 因此能夠埋檯開工的時間反比平時更少. 而所做的更係錯漏百出 (睇o下呢篇blog個心情符號就知 -- '無奈 ')

期間只係完成o左Z兩邊膝蓋後的動力管裝置. 模型原件係由兩個部件組成: 一個係似一雙把手(E24), 另一個就係浮雕式動力管(E4).

第一件事就係將E24雕通, 還原設定中o既類似把手設計.

再來就係重造動力管. 挖出手頭上物資再試試位:
(下圖左一) 穿頸鍊之尼龍繩--已經在中間穿入一條鐵線, 但仍覺得好難控制.
(中間) 鋁線-- 手上只有1.5mm, 唔夠粗, 又買唔到更粗的.
(右一) 銅支-- 粗就夠粗. 但太硬屈唔到所需弧度.

無法子, 唯有又要走轉'老鴨'搵幫手.... 走去賣電子零件舖, 搵o左一陣就搵到呢隻銀色有紋路又夠粗又易屈的cable, 真係正!!
喜出望外下返家就立刻動工, 再加上膠管造parts, 都okay啦....

在'把手'下方預留3mm 電線, 在'腳骨'上鑽個洞就可以分件上色後至插上. 睇落都幾好喎....

嘩!! 原來個把手上下掉轉o左!! 我仲要係左右兩隻腳都整好~~~

掉返正確後原本個窿已唔o岩位, 只好改用幼銅支插上'腳骨'. 原來個窿將佢修成六角形扮detail遮醜吧~~

搞了一大輪搞出成果如下.

話時話, 團友們近排好似少o左update喎~~
各位都要加多d油, 唔係團火會熄o架!!

P.S. 銀色電線購自: 昌記電業(地址: 鴨寮街208號地下) $6/呎

Z Gundam-製作中_04@笑笑團2010+Z無國界小隊

小弟的'每週一up'終於脫期..... 剛過去的一星期比較得閒, 皆因阿女考完試唔駛幫佢溫習, 又唔駛幫佢對功課. 不過就係因為全家'解禁', 反而走o左去行街睇戲(睇o左禮儀師の奏鳴曲, 正!!), 少o左砌o野.不過都冇停晒手, 點少都算做有功課交. 廢話少說, 再來'每週一up'啦!!
開始了部份上色工序, 呢隻Z有d位我係想唔到方法做分件上色的. 如兩隻小翼就要先上色裝入主翼夾縫內. 但反而正好俾機會我先試試個主色配答. 正如我之前o既打算, 今次上色會參考德軍二戰戰機....係唔止參考....係直接照抄 ~~~ 我揀o左圖中Bf 109G沙漠配色, 主色係郡仕o既118 Light Blue 及 119 Sand Yellow.

今次要試d自己未試過o既上色技巧, 參考o左戰機o既上色方法, 在噴灰後先在刻線上噴深灰, 再噴上主色. 效果都算ok啦~~

今次都試用o左聞名已久o既Gaia 121'星光銀', 果然好'令'呀!!!

蒞緊呢個禮拜有幾日假期, 原本應可多砌模型, 不過幾日都排滿期有o野搞~~~ 不過都會盡力而為, keep住團熄熄地o既火!!