哥邦迪β-製作中_02

年頭開o左呢個火頭到現在都有半年,
點少都要出d 進度交待o下啦~~~
以下進度都已係幾個月前整落,
出開blog就post埋佢.
(唉....正室(炮渣)一日未完成, 都未敢放膽搞呢隻妾氏!!)

從舊模型中找到o岩用o既髖部移植俾佢.
腰關節就用上'關節技'o既ball-joint.

再切o左舊版GP-01腰部出來換上, 等佢有番條纖腰.

幾件拼埋就係咁樣, 不過活動範圍未係好好,
下一步要再修改一下.

今次係咁多先, 希望下篇進度唔駛半年啦~~~

渣古大炮-製作中_13.1

因相較多一篇blog放唔晒(原來每篇只限max 20張~~),
至會整多篇13.1出來....

上篇講到小弟玩緊d有趣o野, 其實....就咪又係複件囉!!
之前都試用過原子灰&光硬化畢地複件,
今次材料則用上PU首辨膠(又稱AB水).
在各模型論壇都見過高手們做倒模示範, 一直想試玩o下.
因今次砌隻炮渣有部件要多製幾件, 就乘機搞搞佢.

好多模友都介紹過一間位於旺角中旅社對面一樓o既富聯,
皆因佢有細樽散裝AB水賣, 老闆亦好nice有問必答.
$65買一set回家就膽粗粗試o下.

將要複o既原件用自由樹脂壓出模,
做法可參照可羅索兄詳盡教學:- 自由樹脂及原子灰覆件
用模型刀在模頂部切出一條注入首辦膠o既注料口,
及同樣切出一條排出空氣o既管道.

把左右模用膠紙or橡根合緊後, 用紙摺了個小漏斗加在注料口.
最右個單面模係之前已出過場, 用過來複製渣古膊頭釘補品,
就一併來試試效果如何.

雖然我知道AB水1:1比例係要用重量來計,
但心想我又唔係複大件o野, 用量唔多, 就用volume粗略比一比算數.

兩者混和攪拌好就要快手倒入模內, 等十分鐘左右就可離模.
處女作第一次試複件結果.......

成功!!   件o既details都okay喎.

右上角圓形物就係留在紙杯底用唔到o既首辦膠,
浪費o左呀~~

好!! 第二次我就要試玩複拳頭!!
原件取自HGUC舊渣古, 要用膠條填滿卡榫位,
否則原件可能無法離模.
我仲把拳頭原件一隻手腕向上, 一隻手指位向上,
睇o下邊個方向效果好d.
另外, 可用積木在模上壓d凹位, 方便上下模對位.
(下圖原件已自模取出, 放在模上只係方便說明, 壓模時應要壓得較深入)

講開又講,
之前我在justco十蚊店搵o左好多次都唔見有自由樹脂賣,
有一次見有就掃o左十包!! (一包有兩條)
當時仲後悔係咪買得狼得滯....
但其實真係一d都唔多!!
睇睇下圖, 小弟就係用佢o地量產o左一批單面模做實驗.
至於, 第二次o既複模實驗結果係.......

失敗!!! d件係 '軟林林', '痴立立' o既!!
我以為係未乾, 但等足一日都係咁樣~~~

我都心知係比例出o左問題,
第日唯有再去富聯乖乖地幫襯老闆買個電子磅($172).
老闆仲話d 首辦膠混和後一凝固係咁就係咁, 得唔得立即就知道.

第三次複件在運用電子磅後當然十分成功!!
件o既質感硬度比第一次更好.
至於拳頭方面, 整體效果&detail都唔錯.
只係手腕向上那模具o既件有個大氣泡,
如要再倒模時, 應可改進條排氣管改善此問題.
其他單面模都ok.

有了此'自由樹脂+首辦膠'簡單複件方法後,
真係有更多可能性可以嘗試,
我腦海中又萌生更多念頭了.....

渣古大炮-製作中_13

成個月冇post進度
雖則唔係多, 都post少少啦, 唔係大家一定以為我停了工~~
其實呢排小弟花o左唔少時間搞d好玩o野,
下篇blog至講俾大家聽係咩

考慮一大輪, 終於決定到支炮點搞~~
原設略嫌單薄o左d, 想話加多軍事味.

再參考了PS3 "Target in sight" game中MS-06K的設定....

用膠管, 膠條&補品搭o左支炮,
炮口(藍色部件)由原件修改而成.

上色待裝上炮座.

暫時係咁多先!! 各位要接住睇埋小弟下篇blog,
該篇至係重點呀! hehe....

三件廿年前舊作

在漫長的'模型友與家人空間攻防戰'中,
小弟斗室中穩守多年的據點, 上個禮拜終被小女個鋼琴所攻陷!!
害得我軍大半兵力要退守至'舊居'基地....
但就在'舊居'基地遺址中整備時,
意外地被我發掘出三位已失蹤廿多年的老戰友!!
(事實上除了小弟此BLOG登出近年幾件成品外,
殘存的就只有此三件了.... 仲有好多係砌到一半之'爛尾'作品~~~)

畢竟, 他們三位'年事已高', 有點肢離破碎係在所難免....
小弟用AA膠做些收補後, 就為佢地拍照造個紀錄,
順便回憶年少時砌模型的時光.

第一位係MACROSS的VF-1偵察型.
係小弟初中時代的作品. 比例好似係1:200.
當年在一本超時空要塞的模型集中見過此機的作例及設定,
見佢好似戴住頂竹帽般好鬼有趣, 就動手自己改一隻.
(年少的我.....早已染上'改造癮'~~~)
後來此機正式出現在電影版中成為VE-1,
但細部設定有些出入.


所有改造都係用膠片&雙星畢地.
(當年都未識用混合畢地之類的東東....)
亦未識得刻線, 所有機體線條都係用黑色畫上就算數.
(相中可見左小腿一片機翼及左手有片外掛部件已不知所蹤)

第二位係特裝機兵的裝甲服, 應是在高中時砌的.
當年在 '精密模型' 月刊的吹捧下, 此系列都HEAT過一輪.
只睇設定仲以為裝甲服係主角.
可惜後來睇套動畫時至知,
主角原來係幾隻會變型的車&直昇機!!
裝甲服係 '雜碎' 都不如的配角, 人氣急速下滑~~~

此作品係小弟首次用噴槍噴出高光&陰影,
用的是郡仕油. 由於不懂得用雙星油做滲線,
如果油出界要用原色點上遮蓋, 做法十分笨拙~~

相中可見機體上用銀色點上做 '甩青',
我想當年有砌模型的都有用此 '流行一時' 技法吧?!

最後第三位係SF3D的裝甲服, 高中後期作品.
模型只係直砌, 主要係想試試全隻手油. 用的是雙星琺瑯油.
舊化方面現在看係有點重手~~~

好了, 此集'光影留情'做至此,
是時侯過去被迫縮小的模型檯砌新模型了!!