哥邦迪β-製作中_08@笑笑團2011

(02/10 update)

今日在ws將幾件可以先噴灰的部件上灰check bugs, 大把地方要再補畢地細執... 呢個係砌老模不可少o既步驟.

另一方面, 其實係心思思想試下ws個新抽氣箱 & B仔借出的Silair氣泵. 真係巧正!! 唔該晒各位巴打o既努力

近呢幾個月都冇點樣在自己blog出模型進度, 無他, 係人懶~~ 加上製作時自己常常感到只係重複之前做過o既o野, 都係費時悶親大家或呃人來睇我個blog. 不過想深一層, 咁樣就違反o左前團長創立笑笑團的遺志....呀, 唔係, 係宏志. 笑笑團係要一路砌一路出進度大家互相激勵!! 好啦, 咁就唯有勉強出一出啦~~

除o左在WS休閒地砌隻合皮獸外, 我查實都仍有斷續砌隻哥邦迪,.不過只係搞埋o的細眉細眼地方, 比起笑笑團2010時, 外表上仲係睇唔到有咩大分別.... ha, 上次笑笑團都冇影到自己隻o野, 下圖借來King Sir的靚相, 等各位記得佢係咩款.

小腿內骨架係咁二拼湊成的內構, 就算腳瓜走光都唔會只係見到兩條膠條咁肉嘛.

腳瓜個噴射口個窿用混合畢地造的孤形部件封上, 鑽幾個洞再裝上3mm補品.

噴射口的百葉簾仲要加工至有望裝得返上去.

兩側同尾裙甲用0.2mm膠片拼合做細節.

咦? 個背包點解會黐住個鉗o既??
咪又係加o左磁石囉....

隻哥邦迪個胸, 背包, 小腿外側都加o左磁石. 聰明的你應該估到我想搞咩.
冇錯, 就係大氣圈突入裝置. 不過好可惜, 地理sir的原件量產不能.... 呢個大氣圈突入作戰要暫且擱置. 有朝一日, 我會自製一套出來裝上去. 不過, 就唔知係何年何月....

好啦, 暫時係咁多.
今個月要砌起佢, 真係有難度喎~~~ 睇呢幾日假期進度如何啦.

合皮獨角獸 ver.Soviet tank colour_製作中01@笑笑團2011

(真係好鬼長o既o者, 我..... 起d 網誌標題~~~)

正所謂: 「一年容易又中秋, 一年更容易又笑笑!!」

冇錯, 就在我上年d 笑笑模型債尚未還清時, 新債又湧到咁來.... 就在我債台高築, 惶惶不可終日時, 為何冇好似廣告咁跳個邦民女or大眾女出來同我砌....咁一兩隻?....

應承o左新任團長玩獨角獸大合照, 基本上入場劵就要交出一隻合皮或爆皮模式獨角獸成品. 呢隻HG都出o左一段長時間, 相信好多C兄都己完成/ 砌緊/ 齋拍過一隻. 而小弟呢, 就襯新搬WS仲未有得噴灰噴油, 坐在碩大工作檯前同C兄們吹水時, hea拍起隻合皮獸算做係應o下景開功大吉.

呢隻打算係OOB齋玩上色, 見大家都喜愛將佢砌得乾淨立立令"七彩蝦條姐姐"咁(哪, 想認後生就千祈咪話知道"七彩蝦條姐姐"係乜水~~), 我又來專登拗頸砌隻青BB扮蘇軍坦克污糟立塌合皮獸!! 出來效果? 哈~~ 真係天曉得!!~~

既然係扮坦克的話就冇理由咁滑溜靚仔.... 早前有幸見過YA大隻Sniper F2渣, 咁就立即抄考佢用快乾膠在部份parts表面做少少手腳, 等佢有d 鑄造紋感覺. YA大本尊係用手指直接印在快乾膠表面(!!)去印出鑄造紋, 而我就東施傚顰帶住隻食雞用膠手套去印. 效果當然比YA大相去什遠啦.... 係咪, 我對模型o既愛唔夠強烈呢??!~~~

下圖在ws用電話影, 鑄造紋效果在胸的部份較易見到.其他如肩甲袖口位就因解像度問題唔多睇得出.

原盒只跟來一支大炮真係唔多合用. 想話搵密識支Zulu用機關槍(有d 似AK-47)過佢楂. 有冇巴打肯割愛?? (價錢&交收問題請PM相議)

東瀛神兵!!~~

友人特地自東瀛帶回來的神兵, 事不宜遲就拎小弟砌緊隻邦哥來試試劍!!

感覺上係唔駛點用力就入晒....舊膠. 鋸痕細, 鋸時產生o既膠碎好少, 鋸面比蝕刻鋸仲平滑. 而刀鋒比蝕刻鋸長, 鋸落更加順手. 刀背有金屬片支持, 鋸直線時唔怕如蝕刻鋸般曲o左. 當然, 這一切方便, 都係要以高價($300多)蒞換取~~~ 所以, 小家的我在鋸個背包遇著又厚又硬的膠料時..... 都係換返把蝕刻鋸先~~

響呢度再次多謝'友人'自東瀛帶來種種神兵利器, 好等我輩為中日兩國貿易平衡作出唔少"貢獻"!!~~

看至此處, 如果你仲未覺得呢個係"呃post", 會唔會係我文筆有進步呢??

事情可唔可以簡單d呢?!

今日最新消息証明o左菲國並唔係冇專業swat team的:-

菲軍方特種部隊在人質事件當日在場戒備但警方無徵用

其實唔駛靠軍隊, Philippine National Police (PNP) 自家都有精銳部隊, 隨便google一下"pnp swat" 都可以搵到幅05年舊相, 當年已有裝備精良的部隊:-

一個要同恐怖組織"阿布沙耶夫", 分裂勢力等武裝組織長期作戰o既國家, 要依靠23號晚出動的"特種部隊", 相信一早亡國好耐....

香港人近幾日在震驚, 悲傷影響下, 恐怕都跌入將其他地方, 種族人仕典型化(stereotyped)的陷阱中, 當然, 當中包括我自己. 常常聽到的是蠢, 無能之類的形容詞. 我地好容易將自己o既價值觀套在別國人身上, 以為放之四海皆準. 以為世上人命最重要, 什麼政治, 特權都應讓路. 無法子, 我地成長o既環境如此, 以為係理所當然....
將心比己, 我地以為菲國當局都會以救出人質為首要目標, 而唔會有其他隱瞞議程 (hidden agenda). 我地又以為佢地會出動最精銳部隊救人質, 而當晚得班甩甩漏漏"特警"係佢地冇錢冇裝備加上蠢(我地相對有錢及自命有學識), 因為我地冇地方政府勢力, 政治人物唔需要軍方或警方支持都可以上位, 亦根本冇需要犧牲人命去維護自己勢力及既得利益. 而事實上, 在極權, 腐敗, 貪污下, 再奇異, 再荒謬的慘事都會發生!!

而廿多年前6月4日的晚上, 同樣令人廢解的慘劇亦都在全香港人眼前直播過~~ 一樣令人震驚及悲哀.

響呢d事面前, 個人無力感係千斤的重. 我想我會積極d面對, 盡微力守護住香港呢片淨土(相對地說), 唔好俾極權, 腐敗, 貪污入侵.

有議員及政黨震震有詞要求參予菲國調查, 又或講到派SDU去他國救人質者, 都一律由小弟贈送"小鯊三寶"予以獎賞~~~

F2渣古-完成!!

暗雞日7月4都過o左成個幾月,
呢隻攤凍了的雞又緣何仲要出來獻世?!

2010都過o左大半,
小弟至今都未有件今年砌的成品出過blog,
所以肉d都要挖佢出來撐一撐場....
大家俾俾面咪噓我~~

哪...哪哪..... 唔係完全冇新o野o架,
睇下, 上次暗雞日冇呢排彈匣o架.
之前隻F2渣完成後自己睇極都好似爭咁d東東....
就係爭o左排彈匣!!
原件欠奉, 唯有動手用膠條膠棒自製.

上次暗雞日都唔記得帶出來的三連裝飛彈箱.

多返呢兩件裝備就成隻渣冇咁寡.

個頭底部補返張相.
原件用來調校隻單眼的窿改去後方,

咁隻渣的單眼就仲可以保持左look右look的能力.

今次製作嘗試舊化都係其中一個目的,
跟 KY Sir學o左o既野都係時候練習一下.
支槍就比較易睇到點甩青的效果.

除wash外, 都試用粉彩在腳上掃上沙塵效果,
不過都係太輕手, 薄噴上透明啞油後唔係咁明顯.
上次暗雞日亦有大大同我講隻渣的舊化看來太輕手,
我連忙事後再加多o左d甩青&水漬,
唔知家陣會唔會好d呢??
不過, 我自己就成日驚重手舊化放在144比例上,
會有過火的情況....
自己又未掌握得準確,
所以就寧願輕手d唔夠再加.

補充一點關於呢個怪雞上下兩截配色,
之前在暗雞日亦都講過.

呢個配色的F2係出現在0083故事中,
留守在非洲沙漠基地的自護殘黨.
由於物資短缺的關係,
基地中的自護軍已接近無零件可用.
唯有拆解舊機體, 又或在舊戰場上撿取可用的零件,
用來維持基地中MS的運作.
呢個配色就係沙漠色的渣古上身,
直接安插到制式淺綠塗裝的渣古下身而成的F2渣.
(唔知係殘黨軍連沙色油漆都冇, 定係太懶油都費事呢??)

最後, 梗係要以「暗雞」logo做結尾啦~~
當日, 真係從各大大的分享中學到好多o野!!

P.S. 未知咩係暗雞的blog友, 可到JKL呢篇blog睇睇當日盛況:

暗雞...ID4

無所事事的一up

世界杯一早踢完,
電 J 我又早已放棄,
近排我只係過住無事忙的生活,
連自己個blog都冇update成個月....

你可能仲記得我砌o左隻暗雞F2,
為何冇出post呢??
查實我仲想整小小o野, 等100%至出相.

近排比較特別的事,
係搬緊workshop,
及立即進駐新workshop的11盒00巾.

11盒00巾的正解:

係為o左蟹sir太太工作o既centre舉辦o既模型興趣班而買入.
小朋友都o岩砌呢隻00 o卦.....我估.....

法國同我齊齊出局....

我的跨年電J作, 因世界杯而停頓....
盡算, 有畫面中食波餅的亨利倍我出局~~~

重召後備炮吉的這爛方案,
好唔好"起錨"呢??