Z Gundam-製作中_03@笑笑團2010+Z無國界小隊

各位觀眾, 又到o左"每週一up"時間,
雖則今週冇咩好up, 還望各位勿怪小弟在此'狗嗡'.
(注意: '狗嗡'一詞近日已被立法會官員定性為粗口,
如各位覺得被冒犯, 煩請自己加番 'o都 ~~~~' 一聲, 唔該.)

嘩嘩嘩!!~~~ 大家睇o下, Z對手呢d浮雕式喉管~~ 點可以忍受佢o架?!
快d拿出蝕刻鋸鋸走佢!!
我鋸~~我鋸~~~~(兩個小時後) 兩隻都搞掂!! 嗚~~ 當堂舒服晒...

之後梗係要用膠條重造番兩條喉啦,
咦?!... 點解....點解同未改之前冇咩分別咁o既??
(如是者又過一晚....)

[以上為改造傻佬自白, 家中小朋友切勿模仿]

okay, 都係入正題講番隻HGUC Z 製作:-
今次呢隻亦唔例外, 又玩加磁石掛盾. 圖中3mm直徑強力磁石真係幾好用,
可以剛好塞入去原本用來插個盾的pc膠中. 因Z個盾都幾重, 圖中磁石要塞兩粒加強吸力.

盾的一方就用到小弟手頭上最大粒, 最好吸力o既磁石. 用膠片搭個箱仔塞佢入去, 再在盾裁出一個空位固定入去.

正面加多個小方形膠片, 就可以掛盾.

吸力尚算ok, 但因磁石接觸位較低, 輕力搖動時個盾仍然有機會甩出來. 可能要加多個鉤之類的固定裝置.

到o左介紹 '窮人專用補品' 呢個環節, 睇睇有咩cheap cheap 改造補品:-

1) 閃令令反光圓形膠片仔

早幾日响洗衣街一間賣手工藝用品店買到呢包東東, 約$1~2.
自己好難切出o既細小圓形薄膠片, 用來加detail就真係fit晒!!
真係不枉我一條麻甩佬飽受店內C9及姐仔奇異o既眼光.... 
使用時, 因我怕膠片上反光層會影響AA膠黏合力, 故先用沙紙輕磨走反光層至貼上模型. 有一點要留意膠片大小有些微差異, 要揀o岩相同大小數片至可開工.

使用例子: 小圓片扮旋轉軸 (圖中已噴灰)

2) 大頭針變鍋釘

呢招查實一早有同好介紹過, 不過今次係小弟第一次用. 早排在公司櫃底發現一盒祖國生產'菊花牌'大頭針靜躺著等生鐵鏽, 不如唔好浪費用幾支來玩o下.
(N年前大頭針係用來如萬字夾一般拮住d文件, 後生一輩就肯定未見過....)
用剪鉗剪去尖的大部份, 留下1-2mm.
小朋友要注意!! 剪的時候要保護眼睛, 因尖銳一瑞可能會射出來傷及自己及旁人, 最好找大人代勞. 而大人都同樣要小心, 我就會在一個厚膠袋內剪. 保證剪後大頭針個頭同尾都在袋內.
使用時先在模型鑽個1mm洞, 再在同一個洞用1.5mm淺淺地鑽洞, 等個大頭針頭可埋入少少. 再插入大頭針頭及用AA膠黏好, '鍋釘' 就此搞掂.

使用例子: 位於ball-joint前方

好啦, 節目到此為止, 下週再同大家up過!!