XM-06 Dahgi Iris-製作中02@電擊09

呢個就係去到昨日(14-Jun-09)為止o既進度:- 散件一堆....
頭, 胸, 腰, 兩條大腿&小腿搞緊,
兩對手, 背包, 武器未郁過~~

趕工中, 家陣就去埋位!! 大家祝福我吧....

XM-06 Dahgi Iris-製作中01@電擊09

為了參加09電擊, 在不可能成功的plan A泡湯下, 急忙找來plan B進行, 結果就係以下產物:- F91故事中Crossbone Vanguard (港譯: 死亡先鋒) 的指揮官用偵察型MS

XM-06 Dahgi Iris.

(群眾: 嘩~~ 真係老模呀?!~~ 好悶喎~~~)
咳咳.... 係呀, 小弟不材, 只有一道板斧 =_='

由於小弟手頭上冇F91的廣東話DVD/VCD, 因此唔知劇中呢隻MS的中文名. 老牌本土巾迷網站G U N D A M 壞腦研究室亦未cover到F91. 於網上search到的中文名是有點娘娘腔的 '達基 · 伊利斯' =>[可能係劇中由女架駛員操作的關係, 不過設定中此MS唔係專用機~~], 為了加強此機之陽剛性, 我暫稱佢做 '大之力士' 吧~~

按小弟砌舊模慣例, 唔理三七廿一先將佢劈開九件至慢慢講!!
當然.... 隨之而來就係勁苦惱點樣將佢拼返埋.... 亦都係因我太喜愛此劈件過程, 完全唔記得幫佢影低全身相~~ 在此要借用1999.co.jp的相俾大家睇睇佢全相. 查實呢副91年(??)出品身材比例已出得唔錯, 只係有舊模的普遍弱點: 如分件不足, 夾口差等等. 另一方面, 大河原氏在此系列作品的一大特點係全身大量加入排氣口&噴射口, 要復原此等細節將會較花功夫.

一開始先搞佢上身.  由於全隻打算擺 fix pose唔玩可動, 因此全身關節可以省略. 而身體內部亦無需留有空間放關節. 為方便上身製作, 從廢件中找來W高達的不知名機體上身, 略為修改後充當簡單內骨架, 打算修改好外甲後再將其掛上. 今次係我首次試用此'內骨掛甲'方法做舊模修改, 希望有好效果啦.... 初步來睇此做法係較方便修改身型, 當然, 要將外甲掛上及連接又係另一難題~~~

頭部原件係十多年前老模一貫出模方法 - 左右兩大件夾埋~~ 而呢副模型有樣好, 就係有附觀景器透明件. 先將雞冠及帽切開分件, 希望能夠復原設定之中如古羅馬頭盔的模樣. 將面部切出, 方便修改面相, 當中亦要夾埋觀景器大小, 所以仲有唔少功夫要做.

出奇地隻大之力士對大腿有七成似渣古(都係出自大河原氏手筆的關係吧~~), 可將渣古大腿延長2mm代替, 慳返重造關節功夫.

上一篇講到隻1/100 Legend, 原先係想話慳功夫, 利用Legend部件去修改呢隻'大之力士'. 可惜想得太美, 左度右度下發覺較難用上.... 唯有老老實實拿起蝕刻鋸片, 左切右劈將副舊模部件修改修改啦~~~ 暫定工作目標係月中可起到全隻大概外型. 希望到月底再出次進度吧!!~~

點錯相, 劈錯模~~

話說小弟上次喊嘈晒, 話要搵"面具佬"隻Providence Gundam(好似係天意or神諭高達....), 各位blog友十分熱心幫忙小弟挖佢出來劈佢, 真係唔該晒大家

!!
結果....在陰差陽錯下(係我老花冇睇清楚~~), 搵錯o左下面呢隻Legend Gundam出來~~ 只怪....佢兩位就實在太似樣!!

在此要多謝tempo兄用"朋友價"平讓隻Legend俾小弟, 仲要係有埋初回特典個Action Base,  麻煩你真係唔好意思....

在熱血上腦之際, 我原本都想話唔理咁多, 劈開佢先再講!! 如是者打開自己個草圖, 再拼埋其他件睇睇, 比劃o左一整晚.... 結果.... 係我冷靜落蒞.... 了解到自己一向龜速....在兩個半月內係絕冇可能砌起計劃中o既五隻144再加一隻大機體~~~ 呢個project都係慢慢砌留待201X電擊啦~~咁跟住落蒞, 又用咩參加今年電擊呢??..... 環顧我檯頭幾隻半成品:-

1. HG Zeta (70%完成)-- 冇顯眼改造太普通了.
2. 炮吉 (80%完成)-- 就算砌得再靚都靚唔過B-Club改件.
3. 哥邦迪 (30%完成)-- 完成度太低, 不如砌過另一隻....

加上呢三隻非為電擊而砌o既半成品都有同一問題:- 以單一機體來說係太細隻唔顯眼.... 若果係要參加電擊, 最好都係起過另一壇較大件o既作品~~~ 當我呆望住櫃頂 '大模山' 納悶今年參唔參加電擊之際, 再望望隻Legend, 咦?!~~ 有d野喎~~在'大模山'中....有盒舊模彷彿向我招手~~
tempo兄, 你盒Legend都係難逃一刧, 一樣照劈!!!

P.S. 唔記得講, 隻老模來自F91.... 仲有隻Z要暫時停工讓路了.....

我要劈佢!!

各位blog友, 有冇呢隻1/100素組出讓??
因主要係用來劈件, 盡量唔想買隻全新咁浪費.... 剩係背包加龍騎系統都收.

各位看倌梗係問: "咦?! seed你都o岩? 用來做咩先?"
1) 冇錯係seed, 不過係用來砌d同seed原著無直接關係o既o野.
2) 我估你都冇估錯, 係電擊作. 不過得翻兩個多月.... 我應該趕唔切.... 冇緊要啦, 都要開始o左先.

上機界

小弟隻拙作竟有幸上了今期機界!!

事緣於前個月KY兄同科幻模型會班模型高手開會, 就叫埋KITP兄, 蟹SIR, YAYA兄同小弟上去吹水. 對於我呢位老年新手來講, 呢個一開眼界的機會又點會放過. 於事乎膽粗粗帶埋自家兩隻144渣古上去俾大家狠批一下. 機界阿黎兄見到蟹SIR隻精神感應型渣古, 梗係要留低佢映相出篇稿啦. 至於小弟隻炮渣&水渣就順便'搭單'留低埋映相, 真係估唔到承蒙機界編輯部錯愛, 刊登了小弟的稿件!!

機界係我做學生時代已經有的正宗本地模型雜誌(應有十多年吧~~~), 到今時今日, 可算係本地製作碩果僅存的一本. 由於小弟屋細又愛儲o野, 買本模型雜誌都唔多捨得掉, 所以近年來都真係'買少儲少'.... 機界都冇例外而停買多年. 今次有機會認識 '科幻模型會'一班同好及有作品登上機界, 都可以算係'再續前緣'. 雖然, 近年同好們對機界確實係有讚有彈, 不過此雜誌有著多年歷史, 已經接近係'集體回憶'一類. 自己能有一篇稿可以登上機界, 要算係小弟所能做到對雜誌o既實際支持.

回想當年, 星期日同屋企人去飲茶時, 走到書報檔目光總係搜索封面有著'機動世界'四個大字的呢本雜誌, 又點想到多年後自己真係有作品在上面刊登呢?!

Z Gundam-製作中_06@笑笑團2010+Z無國界小隊

'每週一up'嚴重脫期兩週~~~ 其間冇咩明顯進度, 不過拖到今日'醜婦都要見家翁', 硬著頭皮都要up一up....

部份內構要先組合及上色至可裝上外甲, 如大腿甲就要內骨上色後至可組合. 為貫徹今次承諾之"原創色", 內構棄用常見的灰色轉而用天藍色. 概念係來自戰機起落架之類機倉內部色調, 目的在強調 "Z擁有飛行形態" 此特徵. 都有想過用歐美戰機機倉內部常用之白色. 不過考慮到用白色的話, 對部件內側打磨及細部都要有較高要求, 懶人如我實在敬而遠之..... 所以退而求其次, 揀o左多見於蘇聯系戰機之天藍色作內構塗裝. 至於效果呢.... 因我冇試過色, 真係天曉得!! (不過家陣睇相好似深o左少少, 有d似高達隻藍色~~~ 不過我人太懶 , 唔會改色再噴過了....)

另外搞緊 Z背部兩件大三角形部件. 按小弟慣例, 所有HG模型常見o既"實心"進氣口及噴氣口要全部挖通, 再用膠片/廢件加返少少簡單內構.

不過就係呢d 所謂'堅持'花了唔少時間.... 講真, 小弟好怕要雕通呢類正/長方形洞.... 一陣就係個洞邊唔夠直線, 一陣就係個洞角唔夠銳, 又切又磨可以搞好耐. 唔知各位大大有咩神兵利器/手法可以加速類似作業呢?

製作其間有件 '怪事' 發生~~~ 話說小弟在夜闌人靜, 正眼朦朦 '針隨意走' 刻線之際 (即係話毫無設計之下刻線~~), 左右兩件部件都刻好就順手拼埋比對一下.... 一拼之下赫然發現以下圖案!!

是某'國寶'在顯靈嗎??! 是的話是否要傳授蒼生極速完成佳作之術?? 定係我砌模型太怠慢而觸怒了神....級人物?!! 可能....只係太夜太眼倦o既錯覺....