賀笑笑團2011完滿成功+後感

今年笑笑團有多成功,
相信有來到現場的人定能親身體驗到.
而未能抽身/抽空到來的模友,
亦都能從眾多的blog友現場報導感受一下:-
BLOG友笑笑團2011完滿結束 (17/1更新)

我自己就連相片亦冇映到幾多幅,
不如我就以自己角度去側寫一下呢次盛事吧.

雖然當日我冇咩貢獻, 不過都算做係有職在身,
要在Ya大及Lastman的講座幫手影video.
食過午飯後亦匆匆返回展場睇睇有何事可幫手.
加上當日作品眾多而且件件精彩,
我就連每件去睇一次的時間都未有,
更遑論可以逐件去影....
我都要靠重溫各攝影大師的blog去細味每件作品呢~~

另一唔得閒逐件睇的原因係,
笑笑團當日在隔壁舉行的是Bricks Adventure 2010 Lego作品展,
吸引好多家長帶住小朋友睇完玩完Lego順便過來逛逛.
有部份家長並冇睇實自己的公主王子,
任由佢o地"親手"去感受作品!!
真係喝都喝唔住~~
有團友仲話有大人出手去解體參展模型,
真係"唔好大教壞細"!!
聽到我火都蒞埋!!!
作為主辦單位, 我o地真係要好好想想下屆有何對策,
畢竟唔想開開心心來參加的朋友要承受被人整爛件的風險...

今年件多但檯不足, 只有6張大檯 + 一張細檯可用作放件.

好在房中有個上手留低冇拆的小舞台,
正好可以放各位大大的月曆作.

笑笑團另一大看頭就係蟹蛇同團長的導賞.
睇作品之餘仲可以識埋作者,
唔會好似其他模聚般通常都係相識的一小群人密密傾,
一圍軍事, 一圍車, 一圍飛機, 一圍科幻...
笑笑團冇比賽, 冇較勁, 冇獎杯,
來者皆為睇模型+騷騷自己作品+學學o野,
大家都比較放膽去問去傾,
唔會覺得自己新手/高手就唔敢/唔想同人講o野.
再加上, 來得笑笑團的唔多唔少都係高達fans,
總會有題目講得熱烈高興.

好可惜導賞部份我只係聽得一少段,
皆因見場中大部份人集中成一團跟住蟹蛇同團長,
多慮的我總怕有一兩個上文所講唔生性的小孩or大人,
都係企過兩檯睇住會安心點.

當日節目近尾聲的獨角獸大合照,
下圖係合皮mode的廿多件作品.
作品總數達50+, 要分三輪排排隊影呢!!

睇返已往笑笑團(since 2008~)自己影的相,
常常都唔記得影自己作品,
今年我記住記住記住要影,
結果, 就真係只影o左自己帶來的三件....

今年算係我歷年笑笑團以來"完成度"最高的一年!!
(即係冇只噴灰or用blu.tack黏住手手腳腳)

(1) 月曆作 -- 沙漠F2渣

附註: 參加2010年中的暗雞作.

初嘗試KY教的點甩青, 只敢輕手舊化.

***

(2) 原想參予月曆作但趕唔徹,
"未完的Z故事" -- 哥邦迪β

附註: 仲有個盾未完成的98%作品.

當日我寫簡介話砌了兩年,

實則睇返blog第一post係08年1月~~

即係斷續砌了三年!!

冇咩運用新技法但夠隨意,

大部份自己想做想改的部份亦已做到.

當日亦有幾名模友好有興趣問我改造的細節,

--- 這份"回報", 已夠我keep住繼續去砌去改

***

(3) 大合照入場劵 -- 綠角獸

附註: 三件作品中投入時間心機最少的一件,

但注目度卻又可能係最高的作品.

今次擺明係舊化習作, 所以放膽去玩,

結果又幾ok喎~~

待我將未舊化的灰色部份及槍完成後,

再影相俾各位狠批.
有點奇怪冇人問我盾上寫乜俄文,
可能係個個都估到啦--- 就係俄文的"Unicorn"

***

好啦, 今年笑笑團聚會部份完結,
但係各位團友唔好忘記笑笑團的主力部份,
就係keep住砌, 加上出進度呀!!