2月12日舉行的2012笑笑團圓滿結束,
有參予呢次活動的blog友係唔係都已盡興而回??
而各位又有冇咩得著帶走呢?? 係抽獎禮物? 定係製作心得呢?

今次笑笑團小弟只係砌得起一隻機體參加,
就係華佬發起的暗雞"GVG我們的主角機"之中,
我所選的RX-178 Gundam MK II.


呢次製作因小弟要兼顧V30艦身的製作而比較少影相,
不過點少都出返篇blog算係做個紀錄啦.


裙甲/ 膊頭裝甲

主要使用evergreen的0.5mm黑色膠片做背面簡單detail.
用鉛筆在紙上印出裝甲輪廓,
cut 出紙作為模版再依據紙模剪裁膠片.
我直接以混合不地搓成丸狀壓在外甲後再壓上裁好的膠片,
調整好位置後就在膠片邊緣滲入AA膠固定.
呢個方法勝在夠快又唔駛設計一大輪.

膊頭關節

原本的肩關節與膊頭裝甲有距離,
跟本就唔似係同一個機械結構..

因此以膠片修改一下膊頭裝甲與肩關節的接觸面,

等佢有返整體的感覺.

光劍收納位

下圖左邊係模型原本設計,
光劍係靠背包的兩支構造物上的突出榫位卡入劍身的凹位固定的.
現改為在構造物內藏強力磁石,
光劍則嵌入萬字夾的鐵支後以膠片填平,
切除光劍收納位的卡榫後光劍就可以磁力固定.

足部假油壓管

油壓管的製作相信有留意KAKU大神的blog都會耳熟能詳,
小弟能力所及只係做個簡單的假油壓管.
可以介紹的係圖中銀色的鋁線,
係購自吉之島特價店(現已唔係十蚊店了...)
有多種粗幼顏色, 一綑一包賣的.

另外, 今次製作又嘗試另一"神兵".
在各方"好友"放毒下買入'魚地球牌'銼,
價錢要七八十蚊一把.
我自己覺得強處在於比較"食"膠,
輕力推一兩下就磨至平滑少銼痕.

下圖的腰側甲就係由右邊原件,
以職人鋸在原本平的邊位鋸出一級落差,
再用魚地球銼在鋸後位置推一兩下銼平.
兩三分鐘功夫就可完成一邊!!
所以呢, 神兵者, 唔係用佢就可以砌出靚模型,
而係俾經濟上可負擔者用錢買時間咁解啫~

噢, 唔好意思, 一下子就跳到上色....
其實改造方面之前所講的已七七八八,
剩下的都係打磨, 加細部, 刻線等功夫,
都實在冇咩相可影.

今次上色自己有新嘗試,
之前未試過MAX之類的噴法.
因此次華佬講明要標準色乾淨feel,
咁又試下挑戰下自己.
底色用上較鮮的藍色,
下圖攝於2月11日, 即係笑笑團之前的一天,
哈~ 你話呢劑係咪大大鑊呢 !!...

幸好, 在B爺及華佬出手相助, 幫我滲線滲到凌晨兩三點,
而我自己亦不眠不休砌足24小時之下完成主體,
(見下圖攝於2月12日早上)
總算, MK II 可以勉強見得人....
亦因為通咗一晚頂, 笑笑團當日我得返半條老命,
雖未死得, 但係都係渾渾噩噩唔知發生緊咩事矣~

笑笑團當天GVG的盛況,
最右的就係拙作MK II.
總算不費我的通宵及室友的幫忙,
如缺少咗隻MK II, 真係冇面目向江東父老交代.....

未100%完成的MK II,
仲有水貼, 背包喉管, 盾等等....

就讓我阿Q一下, 套用前團長的說話,
笑笑團聚會唔係模型製作的句號,
而係要繼續砌落去!!

MK II 成品, 一定會同大家見面o既!!
(不過我要休息一兩個禮拜先...hehe)

我連袋的巾- HG Mk II_製作中02@笑笑團2012

上次更新Mk II 的進度已係兩個月前....
不過老實講都仲係冇咩做過~

講返下製作基本o野啦,
手的改造上次講過主要係換ABS肘關節.
至於個肘關節連接上膊頭就靠插入一支PC膠條.
而我自己就好喜愛用WAVE出的一set 黑色PC膠關節的框自製呢類活動部份.
貪佢比笨大原裝的PC膠硬好多,
既可切亦可磨.
所以我一定成set連關節連框留起又切又鋸用盡佢為止.

隻HG另一唔順眼之處係個背包太細,
我印象中Mk II的背包正式係"牛龜咁大"o既~
咁就唯有動手改改佢.
下圖可見係增大o左4~5mm.

今次試用了evergreen的黑色膠片作改造,
貪佢就算將來噴咀位走光都唔會見到入面有白色膠片.

加厚背包後裁出噴咀位的斜位.

打磨好後黏上左右兩側先前切出來的部份,
背包大致如此.

笑笑團靜靜殺到埋身,
離舉行日子仲有兩個多月(??)
詳細就留意團長公布吧~

唔知大家的作品又如何呢??

144哥邦迪β-完成

好!! 一口氣出埋個"完成篇"先!!
大家恨批吧~~

原本想做到Z劇場版設定中追加的, 膊頭藏有激光劍的機關.
可惜最後都係打開得唔夠大而放棄....
又一殘念!!

呢個2008年開始的project最終畫上句號~
又係為來年笑笑團趕工的時候了!! 

你報咗名未呀??

哥邦迪β-製作中_11

"咦??~ 隻哥邦迪係2011笑笑團咪出過囉, 做乜死唔斷氣又來抄冷飯?!!"

唔....係呀, 冇錯係抄冷飯. 不過呢碟冷飯都加咗新鮮材料o架.

上次笑笑團時哥邦迪只有槍未有盾, 近日就終於"的"起心肝完成埋佢.
原本打算在盾中裝磁石, 重現原設般盾上下兩塊可以如高達MK II咁縮起.
不過磁石的位置有問題, 個盾會扭埋一邊.
咁就唯有放棄上下兩段fix 死算數...

盾背面下端用上 TR-1的部件加兩個飛彈箱.
唔肯定原設定有冇飛彈箱,
但在PS2/街機 Z Gundam 中呢個副武器就十分好用.
不過當被敵人打爆個盾就冇得用呢~~


上色後, 勉強加咗少少戰損. 油得唔係咁似, 殘念!!
一於下次再試過.

下圖係iphone 中搵到的舊相,

可以睇到腳瓜未裝百葉簾時的內部.
另外, 我現在習慣係滲完線就先噴透明光油,
跟住就上水貼.
所以d件仲係"令立立"~~

好啦, 下篇就正式出埋篇完成篇, 咁隻哥邦迪就正式 finish!!

我連袋的巾- HG Mk II_製作中01@笑笑團2012

真係慚愧, 到今時今日九月至蒞寫今年第一篇關於2012笑笑團的blog~
睇下團長個list都已經有成品出現,
我到家陣至話開始砌, 真係要"拿拿林"小改怡情有貨交先至得嘞!!

大家見到上面個banner都知我砌o既係高達,
咁為左配合主題, 我呢個初代高達迷(4X~),
唔砌0079的RX-78,
第二套TV動畫中前半部的主角機RX-178 Gundam Mk II就真係冇走雞.
睇返1999.co.jp 呢套模已係2002年出品的第30隻HG(當時係泰坦斯colour),
成十年前的模型已開始可以沾上老模的邊.
睇睇佢素組個樣你就覺了~

大條大條夾口在大髀, 小腿, 前臂正中央真係睇見都眼冤~

好啦, 一開工就搞搞佢d關節先.
原本的足踝只有一個大ball-joint,
拗大d角度時就成個關節位現晒形玩具味十足.

咁就在小腿內骨加多個關節俾佢.

加關節後一來可擺更大的角度, 二來將來加油壓都會易整d.

原本舊的手踭關節(相中左面)只可作90度彎曲,
換上TR-1 Hazel的ABS手踭關節,
出奇地FIT!!
(其實都唔係出奇, Advance of Z 的泰坦斯MS設定就係自Mk II "退化"出來.)

今次係咁多先, 下篇blog可能出埋我第二隻笑笑作-- HG GM Cannon II